بكام االكاجو لو سمحت
انت في الصفحة 1 من صفحتين
- إزيك يا مدام ناهد، فاضية اتكلم معاكي خمس دقايق ؟
= الأول بس ممكن تقوليلي اسمك عشان مبحبش اتكلم مع المجهول ؟
- مش مهم الإسم، تقدري تعتبريني فاعلة خير
= طب وهو فاعل الخير يخبي إسمه ليه ؟
- عشان الفاعل دايما مرفوع
= أوكيه، فيك أكونت عليه صورة مي عمر واسمه عاشقة القلقاس بالسلق، وواحدة بتقول انها فاعلة خير، غالبا اقدر اتوقع الموضوع اللي هتتكلمي فيه
- اللي هو إيه بقى ؟
= هتقوليلي ان عماد جوزي متجوز عليا
- والله العظيم ما بشتغلك، ولا ليا أي مصلحة اني احور عليكي
= أنا مش بكدبك يا حبيبتي والله انا بوفر عليكي المقدمات، متجوز سحر
- لا معرفش اسمها الحقيقة
= بت طويلة كدا وشبه غادة عبد الرازق
- أيوه صح
= ما هي اسمها سحر
- ايه دا هو انتي عارفة ؟
= من ٤ سنين، واخدلها شقة ايجار جديد في الطوابق، وبيخرجوا كل اربع في نادي الصيد، بس معندهمش عيال، أصلها اتطلقت من جوزها الأولاني عشان مبتخلفش
- بس اعتقد ان جوز حضرتك اتجوزها لأغراض دينية يعني، عشان يفك كرب مسلمة وكدا
= دينية مين يا حبيبتي طب يصلي الأول، دا ميعرفش الفرق بين سيف الله المسلول وسيف الله المختار، هو متجوزها طفاسة،
- دا مريب يا مدام، بس عايزة الصراحة ؟ انتي مريبة أكتر، متزعليش مني
= عشان يعني عارفة كل دا وساكتة ؟
- بالظبط، انا كنت جاية انورك لقيتك عارفة كل حاجة
= وحياتك من قبل ما يتجوزوا، من أيام ما كانوا لسه في مرحلة جمال البدايات
- طب وايه اللي سكتك
= بصي يا حبيبتي، فرضنا اني واجهته ايه اللي هيحصل ؟
- هيطلقها
= وبعد ما يطلقها، تقدري تضمنيلي انه ميلفش على واحدة غيرها ؟
- خلاص يبقى تطلبي الطلاق انتي
= وبعد ما اتطلق
- تتجوزي غيره
= لا خلاص قفلت من الصنف واتجهت لتربية الكلاب
- يبقى تعيشي مع نفسك ومع كلابك
= وليه بقى اخسر نطع بيصرف عليا انا وكلابي ؟ ليه أخرج أواجه الحياة واشتغل واتعب واتمرمط لما ممكن حد تاني يعملي اللي انا عايزاه وانا قاعدة برنسيسة
- طب وليه متقوليلوش انك عارفة ؟
- وانتي هتستفيدي ايه من خوفه
= لو عايز يبات عندها في أي يوم مثلا، هيعدي مني ازاي ؟
